Ang Lupang Hinirang at ang mga Nakibakang Tsinelas

Photo above by: Nina Cerissa Soliman. This is a picture of the dirtied feet of 5 UP students who marched in solidarity with Sumilao farmers as they rallied through Commonwealth Avenue in December 2007.

Annotation:
Ito ang pinakaunang tula ko na nagkaroon ako ng award. Nagwagi ito ng pangatlong gantimpala sa On-the-Spot Poetry Writing Contest ng CODE-NGO Social Development Celebration 2010 "Kasali Ako sa Pagbabago!" sa TRINOMA noong 2010.

Ayan na.

Ayan na ang muli't muling pagdagan

ng mga paang lunod na sa pangako

dagan, tulak,

Padyak, hila pa roon

silang mga paang

mula sa Sumilao Bukidnon

Aapak sa mga mabitak

daraan sa mga burak

patuloy ang pagbaybay

ng mga milyun-milyung apak

patungo sa mga pinagtatanggol

sa inangking tinatamnang lupa

Mabagsik ang bawat

Taludtod ng mga sigaw

Ng pagtatanggol sa

Lupang hinirang mula pa

Sa kanilang ninunong Higaonon

Lumalagitik ang bawat pagpilantik

Sa mga guma namin ng mga

Pang sakay

Dumadagundong ang mga sigaw

Kasaliw ng mga nagbabagang

Tambol sa tarangkahan ng Malacaang.

“Lupang hinirang

Duyan ka ng magiting

Sa manlulupig

‘Di ka pasisiil…”

At sa aming pagsali

Buong galak kaming tinanggap

Ng mga kapatid naming tsinelas

Sabay sa mga taludtod

Sa paglaban sa karapatang-pantao

Dumagan-tulak

Dumadyak-hila sa mga

Bawat balakid dala-dala

Ang paniniwalang

Ang lupang hinirang

Ay para sa ating lahat at hindi

Maaaring angkinin

Ng anumang korporasyon ng mga pinya at saging#.